“Pa natyrë a mun jeton njeri, pa energji a mun jeton njeri, që s’ki pasë ti energji. E për qita ia kom lonë bio, bio-natyrë, Mulaku n’emër t’familjes Mulakve krejt komplet” në këtë formë, Nazmi Mulaku e fillon seancën e tij ndaj pacientes.
Mjeku i ashtuquajtur popullor thirret për shërimin e të gjitha sëmundjeve, përpos sëmundjeve nga lindja.
E ndaj gruas që erdhi për të gjetur shërim, ai pretendon se do t’ia largojë dëgjimin e zërave.
“O ka m’doket diçka si terr krejt mjegull, menojsha kerret po folin, po ecin”, thotë ajo.
Mirëpo të martën, dera e lokalit të tij ishte e mbyllur.
E gjithë kjo u cilësua nga institucionet e shtetit si veprimtari e kundërligjshme mjekësore.
Prandaj për këtë, Mulaku bashkë me P.I u arrestuan nga Policia e Kosovës.
“Prokuroria Themelore në Mitrovicë, njofton opinionin se janë arrestuar në Vushtrri dy persona me iniciale N.M,. dhe P.I., me dyshimin se kanë kryer veprat penale “Ushtrimi i kundërligjshëm i veprimtarisë mjekësore ose farmaceutike“ nga neni 256 i KPRK dhe “Mashtrimi” nga neni 323 i Kodit Penal të Republikës së Kosovës”, thonë nga Prokuroria Themelore në Mitrovicë.
Dy të dyshuarit, me aktvendim të prokurorit gjenden në ndalim 48 orësh.
E sëmundjet që Nazmi Mulaku ka pretenduar se shëron janë stresi, migrena, autizmi, magjia e zezë, problemet familjare, problemet me lukth, frymëmarrje, dhimbje muskulore e të tjera.
Ndërsa përveç në Kosovë, ai ka kryer këtë veprimtari edhe në Gjermani e Zvicër.
