Deputeti i Lëvizjes Vetëvendosje, Alban Bajrami, ka akuzuar qeveritë e kaluara se kanë rritur figurën e Millan Radoiçiqit, përgjegjësi kryesor për sulmin terrorist në veri më 24 shtator të vitit të kaluar, duke e ftuar në zyrën e Qeverisë së Kosovës, ndërsa ka fajësuar Këshillin Prokurorial të Kosovës për heqjen e aktakuzës ndaj tij.
Bajrami ka thënë se ka qenë e ditur ndikimi i Radoiçiqit në veri në shantazhimin e qytetarëve në atë pjesë edhe para se ai të shpallet në listën e zezë të ShBA-së.
“Radoiçiqin e kanë rritë qeveritarët që sot janë në opozitë duke e ftuar në zyre të Qeverisë. Në vazhdimësi është ditë që ai ka impakt të madh edhe në shantazhimin që u bënë qytetarëve atje. Kurse nëse po flasim për Këshillin Prokurorial, e ka liruar prej aktakuzës”, ka thënë Bajrami në emisionin “InfoNata” në Tëvë1.
Deputeti i VV-së, ka folur edhe për kritikat për dy ligjet e fundit të miratuara nga Kuvendi i Kosovës, atë të Këshillit Prokurorial të Kosovës dhe Këshillit të Pavarur për Media.
Sipas tij, për dy këto ligje Komisioni i Venecias ka dhënë raport pozitiv dhe edhe disa nga rekomandimet e BE-së janë përfshirë në ligje
