Bashkimi i Sindikatave të Pavarura të Kosovës, ka kërkuar nga Qeveria dhe punëdhënësit mbrojtjen e punëtorëve të ndërtimit në këto ditë të nxehta.
Sipas BSPK-së, ndërgjegjësimi i komunitetit për rreziqet e stresit të nxehtësisë është thelbësor në nxitjen e një mjedisi më të sigurt pune.
“Temperaturat vazhdojnë të rriten, siguria dhe mirëqenia e punëtorëve të ndërtimit janë në rrezik më të madh se kurrë më parë. Pak ose aspak po zbatohen masa gjithëpërfshirëse për të mbrojtur nga rreziqet e nxehtësisë ekstreme fuqinë tonë punëtore të përkushtuar. BSPK beson se mbrojtja e punëtorëve tanë është një përgjegjësi e përbashkët e partnerëve socialë. Qeveria dhe Punëdhënësit duhen të marrin një rol aktiv në sigurimin e burimeve dhe mbështetjes së nevojshme, ndërkohë që ndërgjegjësimi i komunitetit për rreziqet e stresit të nxehtësisë është thelbësor në nxitjen e një mjedisi më të sigurt pune” thuhet në komunikatë.
Po ashtu, ata kanë shprehur shqetësimin për mungesën e pajisjeve të duhura mbrojtëse të kësaj kategorie të punëtorëve.
“Aspak masa mbrojtëse për t’ua mundësuar punëtorëve të ndërtimit pushimin në kushte të freskimit në vendpunishtet e tyre. Punëtorëve u mungojnë pajisjet e duhura mbrojtëse dhe veshja e përshtatshme për punë në kushte ekstreme, dhe ata nuk kanë fare mbrojtje nga dielli i ashpër dhe temperaturat e larta”, thuhet më tej. /teve1.info
