Sulmuesi Alvaro Morata mund t’i mungoj Spanjës në finalen e “Euro 2024” që do të luhet të dielën në Berlin për shkak të lëndimit.
Në fakt, Morata u lëndua papritur dhe atë në mënyrë të çuditshme pas ndeshjes gjysmëfinale me Francën, të cilën Spanja e fitoi të martën mbrëma me rezultatin 2:1.
Morata po festonte kalimin në finale pas ndeshjes me Francën, kur një tifoz hyri në fushë dhe iu afrua spanjollëve për të bërë “selfie”.
Sigurimi i stadiumit e kapi tifozin, por njëri prej tyre pa qëllim “ndërhyri” në Moratan. Kapiteni i Spanjës kapi menjëherë gjurin dhe u largua nga fusha duke çaluar, ndërsa trajneri Luis de la Fuente tha se Morata ndjeu dhimbje dhe mbetet të shihet nëse do të jetë i gatshëm për finale.
Në finale, Spanja do të takohet me fituesin e gjysmëfinales së dytë, në të cilën përballen Anglia dhe Holanda sonte në Dortmund prej orës 21:00.
Morata ka luajtur në të gjitha gjashtë ndeshjet e Spanjës deri më tani në Evropian, ku në pesë prej tyre ishte startues dhe ka 1 gol e 1 asistim.
