Profesori universitar, Seb Bytyçi ka thënë se ekziston një afat joformal që para nëntori kur priten të mbahen në zgjedhjet në SHBA që të ketë një plan të zbatimit të marrëveshjeve të arritura në Bruksel ndërmjet Kosovës dhe Serbisë.
Ai ka thënë se kjo pritet të bëhet për faktin që në ShBA ekziston mundësia e rikthimit në pushtet të Donald Trump, i cili njihet për politika më pro-ruse e që mund të dëmtojnë në sigurinë e Evropës dhe Ballkanit Perëndimor.
“Ka një farë urgjencë në Evropë për shkak të zgjedhjeve në ShBA dhe ekziston njëfarë afat joformal që të ndërmerren disa hapa para zgjedhjeve në ShBA, ku në pushtet mund të kthehet presidenti Trump që llogaritet që është më pro-rus dhe ka politika që e dëmtojnë në sigurinë e Evropës dhe kjo reflektohet edhe në Ballkanin Perëndimor dhe ka mundësi që të ketë në një shtytje që deri në nëntor të arrihet një plan i zbatimit”, ka thënë Bytyqi në emisionin “Ditari” në Tëvë1.
Ai ka thënë se Kosovës do t’i konvenonte një plan i zbatimit, i cili do ta ofronte më shumë në anëtarësimin në Këshillin e Evropës.
“Kosovës i konvenon të ketë një plan të zbatimit të sekuencuar ku qartësohet se secila palë çfarë duhet të bëjë dhe kur. Një plan i zbatimit do t’ia lehtësonte Kosovës anëtarësimin në KiE siç është dërgimi i një draft-statuti në Kushtetuese”, ka thënë profesori universitar.
Bytyqi ka vlerësuar qasja e deritanishme e dialogut ka qenë e dështuar dhe se “kërcënimet e dobëta” nuk kanë dhënë efekte.
Ai ka thënë se Serbisë duhet t’i pezullohet statusi i vendit kandidat të BE-së dhe të pranohet kandidatura e Kosovës.
“Për të barazuar trenin e lojës duhet të pezullohet statusi i kandidati të Serbisë për anëtarësim në BE për shkak se ajo refuzon ta harmonizojë politikën e saj të jashtme me BE-në, vazhdimisht shkel marrëveshjet me Kosovës dhe tash është një shtet spnozorizues i terrorizmit dhe duhet të avancohet statusi i Kosovës, pra të pranohet kandidatura e Kosovës, t’i njihet statusi i kandidatit ku Kosovës i mundësohet që të ketë qasje në fondet e BE-së në të cilat Serbia ka qasje”, ka thënë ai.
Të martën takimi në Bruksel në nivel të kryenegociatorëve ka përfunduar pa ndonjë rezultat, njëjtë sikur ai i javë së kaluar i nivelit të lartë.
