Portieri Diogo Costa ishte heroi i ndeshjes ndërmjet Portugalisë dhe Sllovenisë, e cila u zhvillua të hënën mbrëma dhe i takoi 1/8 së finales të “Euro 2024”.
Portugalia e siguroi kalimin në çerekfinale të Evropianit por vetëm falë pritjeve të portierit Costa. Portugezët triumfuan 3:0 pas penalltive pasi koha e rregullt dhe dy vazhdimet nga 15-të minuta, përfunduan pa gola.
Me pritjen e penalltive, Costa vendosi rekord të ri sa i përket një turneu si Kampionati Evropian. 24-vjeçari u bë portieri i parë në historinë e Evropianit që arriti të priste tre penallti në një seri të gjuajtjeve nga pika e bardhë.
Në të shkuarën kishte raste kur janë gabuar tre penallti por asnjëherë nuk ka pasur që portieri të ndal tri goditjet.
Kështu që, kjo statistikë e bën portierin portugez unik pasi është i pari që priti tre penallti.
Po ashtu, Costa u shpall edhe lojtari më i mirë i ndeshjes, ndërsa Portugalia në çerekfinale të “Euro 2024” do të përballet me Francën.