Portieri i Gjeorgjisë, Giorgi Mamardashvili, është shquar me paraqitjet e tij gjatë Kampionatit Evropian.
Madje, ai është vlerësuar prej portierëve më të mirë, por ndaj Spanjës ishte i paforcë.
I pranoi katër gola të dielën mbrëma dhe Spanja me fitoren 4:1 ndaj Gjeorgjisë avancoi në çerekfinale të “Euro 2024”.
E pas eliminimit nga Spanja, Mamardashvili është i bindur se spanjollët do të triumfojnë në këtë turne që po mbahet në Gjermani.
Sipas portierit të Valencias, Spanja është favorite për titullin e kampionit të Evropës.
“Mendoj se Spanja është favorite në këtë turne dhe do të bëhet kampione. Është mëkat që jemi takuar me Spanjën kaq herët, por është në rregull, nuk është fundi. Do të kthehemi edhe më të fortë”, ka thënë Mamardashvili.
Ai u shqua me pritje të shumta ndaj Turqisë, Çekisë, Portugalisë, por edhe ndaj Spanjës.
Në katër ndeshje të luajtura në “Euro 2024”, Gjeorgjia regjistroi një fitore, një barazim dhe dy humbje.
