Dëshirat i kanë të shumta.
Një të tillë, për ta vazhduar shkollimin, e kanë edhe fëmijët nga komunitetet.
“Për mua është shumë e rëndësishme shkolla dhe shumë të mira i kam raportet me shoqëri me shoqe të klasës”, tha nxënësi – Isuf Sharku.
“Marr nota 4she, 5she, varet,… Me pëlqen Edukata Fizike, sepse luajmë futboll”, tha nxënësi SOfjan Goliqi.
Por, jo të gjithë e kanë të njëjtin fat.
Peng i kushteve ekonomike, shumë prindër e kanë të vështirë t’i arsimojnë fëmijët e tyre.
“Fëmija kanë dëshirë me shku në shkollë por shkolla po i kërkon kushtet e veta po duhet me pasë veshmbathje e pa punësim problem”, tha banori i fshatit Magurë – Fehmi Sharku.
Një numër i ulët i nxënësve nga komunitetet u regjistruan në shkollën “Haradin Bajrami” në Magurë të Lipjanit.
Nga kjo shkollë thanë për televizionin se për të parandaluar braktisjen, kanë bërë përjashtim duke zgjatur afatin për regjistrim.
“Afati për regjistrimin ka fillu me 13 maj deri më 13 qershor kështu që sipas afatit ligjor janë regjistru disa nxënës prej 28 gjithsej mirëpo kemi pak mungesë prej komunitetit romë dhe ashkali që ata në shtator i regjistrojnë nxënësit. Ne jemi të obliguar me ekipin për parandalim dhe braktisje të shkojmë nëpër shtëpija dhe ja kemi mundësu edhe një afat prej shkollës që me shku për ata që dojnë t’i regjistrojnë nxënësit”, tha drejtori i kësaj shkolle, Shaip Fazliu.
Neglizhenca e prindërve theksohet edhe nga Organizata “Zëri i Romëve, Ashkalive dhe Egjiptianëve në Kosovë”.
Sipas tyre, prindërit jo gjithmonë e shohin shkollimin e fëmijëve të tyre si të rëndësishëm.
“Gjatë diskutimeve, shumicën e rasteve prindërit kanë theksuar që fëmijët janë ata të cilët e sjellin braktisjen shkollore, mirëpo ne kemi tentu me ndiku në atë aspektin që fëmijët në atë moshë nuk e kanë atë të drejtë ose nuk e kanë të zhvillum mjaftueshëm atë mendimin e tyre ose lirinë e mendimit të tyre për shkollimin që janë duke e vijuar e që nuk është e drejtë me ia kalu fajin fëmijës në raste kur ne ia lejojmë atij me marrë vendime në moshën kaq të re”, tha Denis Avdiu nga kjo organizatë.
Në disa shkolla në Kosovë vazhdojnë të funksionojnë qendrat mësimore ku kanë qëllim mbajtjen e mësimit shtesë për nxënësit e komuniteteve.