Kampionia e Kosovës në basketboll, Trepça, ka mësuar të mërkurën kundërshtarin e parë në kualifikimet e Ligës së Kampionëve.
Fillimisht, Trepça do të përballet me skuadrën qipriote, Keravnos. Nëse fiton ndaj Kervanosit, atëherë skuadra mitrovicase do të ketë punë me kampionin e Çekisë, Nymburkun.
Ndërkohë për të kaluar nga kualifikimet në stinorin e rregullt të Ligës së Kampionëve, Trepçës i duhet edhe fitorja e tretë.
Kutaisi i Gjeorgjisë, Levice e Sllovakisë dhe Kalev/Cramo e Estonisë, janë kundërshtarët e mundshëm në ndeshjen e tretë eventuale të Trepçës. Turnetë kualifikues të Championsit mbahen prej 15 shtatorit deri më 22 shtator. Vendi dhe orari i detajuar do të caktohen ndërkohë.
Për Trepçën, kjo është hera e parë që paraqitet në kualifikimet e Ligës së Kampionëve. Para Trepçës, në këto kualifikime kanë luajtur edhe Sigal Prishtina, Peja e Golden Eagle Ylli.
