Nën masën e ndalimit për 48 orë, është një zyrtar policor nën dyshimin se ka kryer veprën penale “rrezikim i trafikut publik”.
Arrestimi i tij është bërë nga Inspektorati Policor i Kosovës.
Rastet kur zyrtarët policorë janë të përfshirë ose shkaktarë në incidente, vlerësohet se nuk do duhej të përbënin ndryshim në zbatimin e ligjit.
“Në aksidente në trafik, edhe ata janë vozitës si gjithë të tjerët. Natyrisht që përceptimi i opinionit kur zyrtari policor është në aksidente apo incidente, e sidomos kur epilogu i atij incidenti ose aksidenti është me fatalitet, përceptimi i opinionit është më i ndjeshëm, në kuptimin e shkaktarit të këtij aksidenti ose përfshirja, pasi mund të mos jetë shkaktar por vetëm i përfshirë. Prandaj, nuk e shoh si diçka të veçantë, e që meriton një trajtim tjetër, por si çdo qytetar tjetër përpara ligjit. Në qoftë se ka rrëshqitur në terenin penal, edhe zyrtari policor përgjigjet për veprën e bërë, nëse veç ka prova”, ka thënë Fatmir Çollaku, njohës i sigurisë.
Rasti i fundit, po konsiderohet se shpërfaqë se si qytetarët pa dallim, janë të barabartë përpara ligjit.
“Organet e ndjekjes duhet ta zbatojnë ligjin sikurse ndaj të gjithëve pjesëmarrësve në trafik dhe fakti që janë policë të mos jetë arsye që të njëjtit t’i marrin privilegjet e përfitimit të atyre të drejtave të mos kufizimit të lirisë, qoftë edhe për 24h, qoftë për masën e paraburgimit, sikurse personat tjerë që do të kishin kryer ose do të dyshoheshin se e kanë kryer veprën e njëjtë penale”, ka thënë avokati Asdren Bytyqi.
Si pasojë e aksidentit në Fushë Kosovë të shkaktuar nga një zyrtar policor, që ishte jashtë detyrës zyrtare, një person humbi jetën.
