Në këtë kategori përveç pensionistëve, punëtorëve të sektorit publik e privat, nga shtesat përfituan edhe studentët.
Në një intervistë për teve1.info, Kryetari i Këshillit të Studentëve të Fakultetit Filolozofik, Eduard Sopaj ka thënë që kjo mbështetje prej 100 eurove për studentët është e pamjaftueshme.
Sipas tij duhet bërë një zgjidhje afatgjatë e cila do t’i prekte drejtpërdrejtë interesat e studentëve.
“Për sa i përket mbështetjes së Qeverisë për studentët, ne kemi vlerësuar se kjo mbështetje është e vogël dhe mund të mbulojë shpenzimet e studentëve vetëm për një muaj. Ajo që ne kemi kërkuar vazhdimisht është që të bëhet një zgjidhje afatgjatë për studentët dhe një zgjidhje që do të prekë drejtpërdrejt interesat e studentëve”, tha Sopaj.
Ai tha se si Këshill Studentor në vazhdimësi kanë bërë kërkesë nga Qeveria për mbështetjë të studentëve në forma të ndryshmë qoftë me lirimin e çmimeve të librave apo bursa jashtë vendit, pra ndihma që siç tha ai ndikojnë drejtpërdrejtë në lehtësime për studentë.
“Ne vazhdimisht kemi kërkuar nga Qeveria që të mbështesë studentët në forma të ndryshme, me bursa jashtë vendit, me lirimin e çmimeve të librave, hapjen e një shtëpie botuese në Universitetin e Prishtinës, lirimin e pagesave të biletave të autobusit dhe kërkesa të ndryshme që lidhen drejtpërdrejt me studentët”, tha ai.
Kryetari i Këshillit Studentor për teve1.info tha se kërkesa për lehtësime dhe ndihmë financiare është bërë jo vetëm për Qeverinë Kurti por edhe për Qeveritë e kaluara, sidomos gjatë kohës së pandemisë ku sipas tij studentët janë lënë jashtë Pakos së Rimëkëmbjes Ekonomike.
“Në qeveritë e mëparshme ne kemi kërkuar që studentët në kohë pandemie të përfshihen në pakon e rimëkëmbjes ekonomike por kjo kërkesë e jona është refuzuar, andaj mbështetja e qeverisë me 100 euro tashmë është e mirëpritur dhe e shohim si një hap të mirë për të kthyer vëmendjen nga shtresa e studentëve që nuk janë janë mbështetur më herët nga qeveritë e mëparshme”, shtoi Sopaj.
