Së shpejti brenda institucioneve të BE-së, pritet të diskutohet për heqje të pjesshme ose të tërësishme të masave ndaj Kosovës.
Kështu deklaroi ambasadori Italian, Antonello de Riu në Këndin e Debatit në Tëvë1.
“Mendoj se po, janë mundësitë që të hiqen këto masa. Në fakt ajo që ne gjithmonë ia rekomandojmë autoriteteve të Kosovës si këshillë miqësore, si miq të Kosovës dhe jo si dikush që don të imponojë mënyrën e vet se si janë gjërat, kërkojnë që të krijohen tensione të reja për çfarëdo veprimi e aksioni sepse ndodhemi në një fazë delikate. Në ditët e ardhshme nuk e dimë saktësisht kur do të diskutohet brenda Bashkimit Evropian me shtetet anëtare të Këshillit do të diskutohet mundësia e heqjes së pjesshme apo tërësisht të këtyre masave ndaj Kosovës”, ka deklaruar ai.
Tutje, ambasadori u shpreh se për çështjen e asociacionit të komunave me shumicë serbe, është i domosdoshme filtri i Gjykatës Kushtetuese.
“Ajo që ne kërkojmë me meqenëse ka kaluar shumë kohë dhe dialogu nuk e regjistron asnjë progres, pra është e rëndësishme që të shkojmë përpara më këtë draft atëherë të shohim ta thotë Gjykata Kushtetuese a ka rreziqe për vendin nëse dorëzohet ky draft”, tha ai.
Ndërkohë, për nismën e rihapjes së Urës së Ibrit për qarkullim, ai shprehu dyshime se kjo çështje po përdoret për qëllime politike.
“Ura nuk është e mbyllur, është e qarkullueshme qetësisht në këmbë. Ka qytetarë të etnisë serbe që shkojnë në pjesën jugore për Pazar, por ka edhe të jugut që shkojnë veri. Edhe unë eci lirshëm në atë urë, thjeshtë trafiku automobilistik nuk funksionon…Unë mendoj se kjo është pikërisht ky shembulli klasik, që të marrim një shembull qysh është rihapja e urës me qëllime tipike politike, simbolike dhe elektorale. Këto kemi dyshime të mëdha, i kemi shpreh… dhe shpresoj që autoritete e Kosovës t’i marrin parasysh”, ka deklaruar ai.
Lidhur me deklaratat se së shpejti do të hapet Ura e Ibrit ka reaguar edhe BE-ja, duke thënë se kjo çështje zgjidhet me dialog.
