Është mbajtur konferenca e 7-të për Integritetin e Informacionit “Disicon” në kryeqytet.
Folës në këtë organizim, ishin edhe përfaqësues të shteteve të huaja.
Ambasadori amerikan, Jeffry Hovenier, ka thënë se SHBA-ja qëndron përkrahë Kosovës në luftën kundër dezinformimit, duke mbështetur projekte që fokus kanë këtë çështje.
“Sapo kemi ndihmuar në themelimin e agjencisë së parë të Kosovës për siguri kibernetike. Kohëve të fundit kemi bërë dy marrëveshje bilaterale të mirëkuptimit mes nesh edhe qeverisë për të rritur bashkëpunimin ndërmjet qeverive për luftimin e manipulimit të informatave nga jashtë. Ky është një hap i rëndësishëm që të dalim nga analiza në veprime për adresimin e problemeve. Mbështetja jonë është pjesë e përpjekjeve më të gjera për të ndihmuar shoqëritë demokratike në Kosovë duke përmirësuar integritetin e informatës duke mbrojtur kundër sulmeve kibernetike”, tha Hovenier.
Mirëpo, Hovenier potencoi se Inteligjenca Artificiale mund të përdoret edhe për qëllime demokratike.
“Inteligjenca Artificiale mund të na mbështetës proceset demokratike duke na ndihmuar që të përmirësojmë procesin e regjistrimit të votuesve, Për të thjeshtësuar numrin e votimeve, për të zbuluar, luftuar dhe keq informimin. Shpresoj që ju do të na mundësoni që t’i përdorim më mirë këto”, shtoi ai.
Kurse shefi i zyrës së BE-së në Kosovë, Tomasz Szunyog, theksoi rrezikun që i kanoset demokracisë nga shpërndarja e dezinformacioneve.
“Bota demokratike është në një rrezik që nuk e kemi parë ndonjëherë. Dezinformimi përbën një sfidë për përpjekjet në rrugën për demokraci në Ballkan, e sidomos në vendet e Ballkanit Perëndimor. Ndikimi tejkalon shtrirjen në shtetet veç e veç, duke rrezikuar sigurinë kolektive dhe në rendin ndërkombëtar. Dezinformacioni dobëson institucionet demokratike dhe zvogëlon besimin e qytetarëve në institucione, media dhe shtet“, tha Szunyog.
Ky organizim pati edhe panele të ndryshme që diskutuan në ndikimin e dezinformimit dhe inteligjencës artificial në vend.
