Prapa secilës fotografi fshihet një histori e ushtarëve të KFOR-it, me qytetarët e Kosovës.
Këto kujtime të vitit 2000-2011 të ushtarëve të NATO-së u sollën para qytetarëve përmes ekspozitës “KFOR and Kosova +25 në 25 vjetorin e çlirimit”
Një ngjarje e dhimbshëm është edhe ajo e Koprosaman Valentines, i cili ishte vetëm 19 vjeç kur shërbeu në Kosovë si ushtar i NATO-së.
Organizatorja e kësaj ekspozite tregon historinë e kësaj fotografie.
“Ky këtu është një ushtar 19 vjeçar. Një familje refugjate sapo është kthyer në shtëpi dhe nuk kanë gjetur asgjë aty. Dhe ky ushtari është duke menduar se çfarë mund të bëjë për ta. Ai e telefonon eprorin e tij dhe arrin ta sigurojë një dërgesë të ndihmës për këtë familje menjëherë të nesërmen. Kjo është edhe çka shihet në fotografinë e dytë. Është vendi i njëjtë . Historia e trishtë e Koprosaman Valentines është se ai u vra dy vjet më pas në Afganistan. Ai ka bërë diçka shumë të veçantë”, tregon Sita Kumari-Heartstone.
Ushtarët e NATO-s krijuan siguri edhe për fëmijët e rritur në mes të luftës.
“Kjo vajzë e vogël e ka kapur dorën e ushtarit dhe ai ecën me të drejt nënës së saj. Në momentin e shkrepjes së fotografisë fotografi nuk ka mundur ta parashikonte një gjë të tillë. Ndodhi papritmas dhe kjo është e veçanta e kësaj fotografie sepse e shfaq nevojën për siguri”, tha ajo.
E për të parë këto fotografi erdhi edhe kryeministri i Kosovës, Albin Kurti i cili u shpreh se ekspozita kthen kujtimet në muajt e parë të lirisë.
“Kjo ekspozitë na kthen pas në muajt e parë të lirisë dhe sjell në pah një periudhë historike të rëndësishme për të gjithë ne. Na sjell kontrastin ndërmjet çnjerëzores së një regjimi dhe bukurisë së hershme të njerëzimit. Krahas mbajtjes gjallë të kujtimeve është edhe informuese dhe frymëzuese për brezat e rinj”, tha Kurti.
E kohën kur Kosova ishte në luftë e kujton si një periudhë shumë të vështirë ish sekretari i përgjithshëm i NATO-së, , George Robertson.
“Kjo ekspozitë që Sita dhe kolegët e saj e kanë përgatitur paraqet natyrën njerëzore të saj çfarë ka ndodhur më vonë dhe shërbimi që shumë persona në uniformë dhe të tjerët që i kanë mbështetur ata. Ka shumë tregime që reflektojnë dhe duhet të tregohen për brezat e ardhshëm”, tha Robertson.
Ekspozita “KFOR and Kosova +25” përfshin një fotodokumentar unik nga foto-gazetari skocez Nick Sidle, i realizuar në Kosovë në vitin 2000-2001, duke treguar jetën dhe punën e paqeruajtësve të KFOR-it.
Kjo ekspozitë do të jetë e hapur përgjatë dhjetë ditëve të ardhshme.
