Një aksident mes katër veturave ka ndodhur mëngjesin e sotëm në fshatin Sekiraqë të Podujevës.
Nga ky aksident lëndime kanë pësuar tre persona.
Kështu ka bërë të ditur për teve1.info, zëdhënësja e Policisë së Kosovës për rajonin e Prishtinsë, Flora Ahmeti, e cila tha se me rastin është duke u marrë njësiti i trafikut rrugor.
“Sot rreth orës 07:00 kemi pranuar informatën se në rrugën Prishtinë – Podujevë, ka ndodhur një aksident trafiku me lëndime. Në këtë aksident kanë qenë të përfshira katër automjete. Si pasojë e aksidentit lëndime trupore kanë pësuar tre persona. Me rastin po merret hetuesia nga njësiti i trafikut rrugor”, tha Ahmeti.
Ndërkohë, sipas pamjeve të dërguara shihet se në aksident janë dëmtuar rëndë dy vetura, derisa njëra prej tyre është rrotulluar duke penguar edhe qarkullimin e trafikut.
Ndërkaq, prezentë në vendin e ngjarjes janë njësitë policore, si dhe ekipa mjekësore./teve1.info/
