Kryetari i Kuvendit të Kosovës, Glauk Konjufca ka folur për raportet ndërmjet Qeverisë dhe Presidencës.
Ai ka thënë se relacionet janë të mira dhe nuk ka asgjë dramatike.
Madje, sipas tij këtë e kanë thënë edhe vet presidentja Vjosa Osmani dhe kryeministri, Albin Kurti.
Konjufca të enjten pas mbledhjes së Kryesisë së Kuvendit, është shprehur se dallime për çështja të caktuar ka edhe në vende tjera mes liderëve shtetëror, por siç ka thënë ai ata gjithmonë dalin të koordinuar para bashkësisë ndërkombëtare për çështje me interes shtetëror.
“Relacionet janë të mira nuk ka asgjë dramatike. Kryeministri e Presidentja i dhanë qëndrimet e tyre. Pajtohem me presidenten se qëndrimet e ndryshme nuk mund të quhen luftë politike. Mund të ketë dallime këto janë të natyrshme, kështu ndodhë në çdo vend të botës. Ne kur dalim dhe i formulojmë qëndrimet, para bashkësisë ndërkombëtare dalim më qëndrime të përbashkëta”, ka thënë Konjufca, përcjell teve1.info.
Sipas tij, e rëndësishme është që krerët e shtetit nuk kanë qëndrime të ndryshme sa i përket çështjeve vitale siç ka thënë ai sikur pas 5 apo g vjetëve, kur edhe ndërkombtarët çuditeshin.
“Ajo çfarë është e rëndësishme që mos të përsëritet ajo çfarë ndodhi para 5-6 viteve, kur kryeministri doli kundër ndryshimit territorial, ishin personalitete tjera që ishin pro ndryshimit territorial, dhe ndërkombëtarët çuditeshin se si institucionet qendrore marrin orientime të ndryshme sa i përket interesave vitale të shtetit tonë. Unë nuk shoh asgjë të ngjashme tash me të kaluarën”, ka thënë Konjufca.
Ai ka folur edhe për deklaratën kryeministrit Kurti i cili ka thënë se BE duhet ta dërgojë në Komisionin e Venecias draftin e propozuar për Asociacionin, e të cilin e ka thënë se e mbështetë.
Konjufca tha BE-ja nuk mund t’ia merr Kosovës të drejtën për ta hartuar draftin e Asociacionit të Komunave me Shumicë Serbe.
“Drafti i dorëzuar nga BE ka parregullsi sepse nuk është kompetencë e saj, dhe nëse nuk e modifikon këtë qëndrim po i bie që do me ja marrë me zor një kompetencë Kosovës, kjo është e pamundshme, sepse edhe në dokumente thuhet që Kosova duhet ta bëjë”, tha Konjufca.
