Ministrja e Drejtësisë, Albulena Haxhiu, e ka mirëpritur mbylljen e grupit “Albkings”, gjithashtu përgëzoi angazhimin e policisë dhe prokurorisë për arrestimit e personave që e administronin grupin në telegram.
Haxhiu tha se si institucione e kanë për obligim që të mos lejojnë individë që përmes rrjeteve sociale të shkatërrojë jetët e vajzave.
“’Albkings’ mund të jetë një lajm i pasdites apo mbrëmjeve por për shumë vajza dhe gra, viktima të këtij grupi do të mbetet plagë dhe traumë jetësore. Si institucione e kemi për obligim që të mos lejojmë individë apo grupe njerëzish me mendësi kriminale që përmes rrjeteve sociale apo formave të tjera të shkatërrojnë jetët e vajzave dhe grave”, ka shkruar Haxhiu në Facebook.
Deri më tani janë arrestuar 7 persona lidhur me rastin e grupit “Albkings”.
Këtë e ka konfirmuar kryeprokurori, Zejnullah Gashi, i cili tha se ka gjasa që të zgjerohen hetimet dhe personave që do të ndiqen.
“Falë bashkëpunimit të ngushtë me qytetarët e Republikës së Kosovës kemi arritur që këtë rast delikat sa i përket identifikimit të kryerësve të veprës penale, kemi arritur t’i arrestojmë brenda një afati të shkurtër kohor dhe ky rast si i tillë, target i së cilës kanë qenë qytetarët e Republikës së Kosovës, duke cenuar rëndë integritetin moral të tyre sa i përket shpërndarjes së fotove, video-incizimeve intime të cilat kanë krijuar pasiguri tek qytetarët e Republikës së Kosovës. Sot i kemi diku 7 persona të cilët i kemi në ndalim dhe jemi në fazën tjetër të vazhdimit edhe të zgjerimit të hetimit edhe për personat tjerë”, ka thënë Gashi.
Ndërsa, zëvendëskryeprokurorja, Elza Bajrami-Kastrati, tha se në mesin e të arrestuarve është edhe një grua.
Grupi “Albkings” ishte i njohur për intimidim, shqetësim e ngacmim të grave e të vajzave në platformën telegram./teve1.info/
