Protagonistët e rrahjes në Kuvendin e Republikës së Kosovës, u pajtuan që këtë incident ta zgjedhin përmes ndërmjetësimit.
Kjo është një procedurë alternative e zgjidhjes së mosmarrëveshjes, ku palët mbajnë kontrollin mbi procesin dhe ndërmjetësuesi nuk merr vendim.
Por mundësia ligjore e përdorur nga deputetët për rrahjen në Kuvend, vlerësohet si e gabuar.
“Që nga momenti kur prokuroria ka filluar hetimet, i njëjti ka mundur të shfrytëzohet dhe të mos ngarkohet qoftë prokuroria, qoftë gjykata, me marrjen në pyetje të njerëzve, filimin e hetimeve apo ngritjen e aktakuzës, varësisht si e kërkon procesi gjqyësor. Në rastin konkret, kjo është plotësisht e gabueshme, për shkak se zyrtarët shtetërorë po e shfrytëzojnë një mundësi që të mbyllin një proces gjyqësorë dhe të kenë një dosje të pastër”, ka thënë juristi Anton Nrecaj.
Përmes orientimit në ndërmjetësim, konsiderohet se deputetët kanë bërë kalkulime politike.
“Ata do ta gëzojnë një privilegj pasi që nuk do të jenë në evidencë penale në lidhje me këtë rast. Mirëpo besoj se qytetarët e Kosovës do të vetdijësohen që personat që janë në gjendje me bo rrahje në Kuvend, që në praktika gjqyësore vjen deri tek lëndimet e ndryshme, të lehta, të rënda, e në shpeshherë edhe tek privimi i jetës. Mandej duhet të jenë vet votat e qytetarëve të Kosovës që do t’i sanksionojnë, që lënë imazh të keq së pari tek votuesit e më pas edhe tek ndërkombëtarët”, thotë avokatja Fehmije Gashi- Bytyqi.
Pjesëmarrja në zgjedhje e personave që kanë probleme me ligjin u pamundësua nga një vendim i Gjykatës Kushtetuese. Sipas këtij vendimi, asnjë person i cili është i dënuar në tri vitet e fundit për ndonjë vepër penale, nuk ka të drejtë të kandidojë për deputet në zgjedhje.
