Smith thotë se serbët në Kosovë kishin hedhur kufomat në puse (bunarë) dhe sipas tij, e njëjta po ndodh në Ukrainë nga rusët, shkruan Teve1.info.
Ai tregon disa arsye se pse po ndodh përsëri një gjë e tillë.
“23 vjet më parë, unë isha në Kosovë ditën kur forcat serbe u tërhoqën nga Kosova, duke raportuar për Washington Post. Ndër gjërat më të pakuptueshme që u panë atë ditë: Kufomat e hedhura nga serbët në puse. Historia po përsëritet tani në Ukrainë, me trupa të gjetur në puset ku u tërhoqën rusët. Pse po ndodh përsëri kjo? Së pari, është një formë primitive e luftës, me trupat që synojnë të helmojnë bunarët dhe të mohojnë ujin e pijshëm për vendasit. Por së dyti, është menduar si një mohim i tmerrshëm i njerëzimit, tokat e të cilëve janë pushtuar. Është rezultat i një ideje, të ngulitur qëllimisht nga drejtuesit maniakë të milicëve dhe njësive ushtarake, se vetë toka duhet të plaçkitet dhe të bëhet e pajetueshme për banorët e saj — një manifestim i formës më të vrazhdë të fanatizmit dhe kafshërisë”, ka thënë ai.
Smith ka thënë se është tronditur nga ajo që ka parë në Kosovë.
“U trondita plotësisht nga ajo që pashë në Kosovë, kufomat e futura në bunarë vetëm disa metra larg. E kisha të vështirë të imagjinoja që njerëzit mund të kishin kaq pak respekt për të tjerët — njerëzit me familje që do të shihnin se çfarë ishte bërë dhe duhet të merrnin trupat”, theksoi ai.
Sipas tij, është e tmerrshme të shohësh që kjo histori po përsëritet.
“Mjerisht, në Kosovë ajo shkoi dorë për dore me një mjet tjetër të degradimit të qëllimshëm: përdhunimin masiv. Dhe kjo gjithashtu është shfaqur tani në Ukrainë. E bën të qartë se kjo nuk është vetëm një luftë për tokë, apo burime. Është më personale për ushtarët e përfshirë. Ata janë indoktrinuar të imagjinojnë se armiqtë e tyre janë më të këqij se ata, janë nënnjerëzor dhe duhet të degradohen dhe t’u mohohet aftësia e tyre për të jetuar jetë normale. Me pak fjalë, ata vetë janë helmuar rëndë. Është e tmerrshme të shohësh që kjo histori të përsëritet”, përfundoi gazetari Smith. /teve1.info/
