Gjyqi i katërshës së UÇK-së, vazhdoi me dëgjimin e një ish diplomati austriak, në cilësinë e dëshmitarit të Zyrës së Prokurorit të Specializuar. Ai gjatë shërbimit si diplomat gjatë kohës së luftës, ishte takuar me katër ish krerët e UÇK-së.
Në sallën e gjyqit në Hagë, dëshminë e filloi ish diplomati austriak, Jan Kickert.
Ai gjatë kohës së luftës në Kosovë kishte shërbyer si diplomat njëherë në Serbi, e më pas në Kosovë.
Për rolin e tij dhe takimet me katërshen e UÇK-së, përmbledhje bëri prokurori i specializuar.
“Në fillim të vitit 1998 ka udhëtuar në Kosovë i ngarkuar për t’u takuar me udhëheqësit e partive, ndërkombëtarë dhe anëtarëve të tjerë. Vizitat e Kickert në Kosovë janë bërë më të shpeshta në pjesën e dytë të vitit 1998 pasi ai ishte udhëzuar të krijojë një pikë kontakti me udhëheqjen e UÇK-së për t’i angazhuar ata në procesin politik. Për të arritur këtë qëllim, ai ka marrë pjesë në disa takime me anëtarë të Shtabit të Përgjithshme; përfshirë Hashim Thacin, Kadri Veselin, Rexhep Selimin dhe Jakup Krasniqin”, tha John Capin – prokuror i specializuar.
Dëshmitari tregoi për arsyet e takimeve me ish presidentin Thaçi.
“Qëllimi jonë ishte të identifikojmë një person të UÇK-së që do të ishte në gjendje të përfshihet në procesin politik dhe të ishte me autoritet në emër të UÇK-së”, tha dëshmitari Jan Kickert.
Ai identifikoi një fotografi që iu prezantua nga ZPS, ku shiheshin anëtarët e delegacionit kosovar në Rambuje, ku ishte i gërvishtur pjesa ku dukej ish presidenti, Ibrahim Rugova.
Me këtë rast, u kërkua që kjo të pranohej si provë materiale, çka u kundërshtua nga mbrojtja.
“Ne mendojmë se kjo fotografi është dëmtuar sepse reflekton ndjesinë që ka pasur ky i akuzuar kundrejt këtij personi, armiqësinë pra”, tha John Capin, prokuror i specializuar.
“Prokuroria nuk është në gjendje ta thotë kush e ka gërvishtur fotografinë e tij, kur është gërvishtur fotografia e tij, në ç’kusht është gjetur kjo fotografi në shtëpi të Krasniqit. Ne mendojmë që efekti cënues dhe paragjykues që ka kjo fotografi është tepër i dëmshëm edhe nuk ka asnjë vlerë provuese”, tha avokati i Jakup Krasniqit, Aiden Ellis.
Megjithatë, trupi gjykues e pranoi si provë materiale këtë fotografi.
Ndërkohë, më shumë kohë ishte paraparë për dëshmitarin në kundërpyetjet e ekipeve mbrojtëse.
