Presidenti i FSHF-së, Armand Duka sërish ka folur për bashkë-organizimin e Evropianit U21 me Serbinë, ndërsa ka përmendur edhe Kosovën.
Sipas tij, ky organizim dhe ngjarje do të ndihmoj edhe në njohjen e Kosovës. Në asamblenë e përgjithshme të FSHF-së, Duka tha se infrastruktura nuk lejonte Shqipërinë të organizonte e vetme këtë ngjarje, ndërsa shtoi se futbolli jep mesazhe paqeje, në një kohë të vështirë.
Jave më parë, FSHF-ja së bashku me federatën e Serbisë kanë aplikuar në UEFA për bashkë-organizimin e Evropianit U21 që do të mbahet në vitin 2027.
Ai tha se FSHF-ja është menduar gjatë për të bashkëpunuar me federatën serbe por nuk kishin opsion tjetër.
“Shanset për ta fituar të vetëm ishin më të pakta, si për ne ashtu edhe për Serbinë. Do të donim zgjedhje tjera, por infrastruktura nuk lejonte, ndërsa për Evropianin kishim interes. Cili më shumë se futbolli jep mesazhe paqe, në një moment ku luftërat janë realitet i trishto. Mesazhi ynë është i paqes, sidomos për vendet problematike dhe rajoni si ky i yni. Kjo i shërben edhe njohjes së Kosovës”, tha Duka.
Po ashtu, ai insistoi se gjithmonë e ka mbështetur Kosovën dhe ka lobuar për njohjen e saj në FIFA dhe UEFA. Sa i përket marrëdhënieve me FFK-në, ai tha se ato janë vëllazërore.
