Kryetari i Grupit Parlamentar të PDK-së, Abelard Tahiri,ka thënë se se 30 maji do të jetë dita e fundit për mundësinë e shpërndarjes së Kuvendit.
Tahiri ka thënë se për këtë nuk do t’i ndalin përpjekjet dhe se nëse deri më këtë datë nuk arrihet koordinim, atëherë e humbin mundësinë që drejtohen kutive të votimit më 30 qershor apo 7 korrik.
“Puna e Kuvendit ka degraduar deri në atë pikë saqë me zor mund ta mbajmë në jetë edhe një tetë muaj deri te zgjedhjet e rregullta. Mirë është të reflektojmë, t’i hapim rrugë zgjedhjeve të reja në qershor apo korrik. Tash dy javë jemi në komunikim më intensiv, dhe do vazhdojmë në vijim deri te momenti, siç e kemi thënë këtë të enjte do të jetë dita e fundit për shpërndarjen e Kuvendit, apo 30 maji. Nëse deri më 30 maj nuk arrijmë koordinim për shpërndarjen e Kuvendit e humbim mundësinë që qytetarët t’u drejtohen kutive të votimit më 30 qershor apo 7 korrik. Është dita e fundit dhe nuk do t’i ndalim përpjekjet”, ka thënë ai para mediave.
Ndryshe, me kërkesë të Grupit Parlamentar të Aleancës për Ardhmërinë e Kosovës, është shtyrë seanca e thirrur nga kjo parti për paraqitjen e Rezolutës për shkarkimin e Qeverisë.
Shefi i deputetëve të AAK-së, Besnik Tahiri, tha se ky debat me koordinim edhe të Grupeve tjera Parlamentare do të vendoset në Kryesi.
“Grupi Parlamentar i AAK-së tash e 3 muaj ka vendos në Kryesi një kërkesë për një debat për tri vjet qeveri. Në diskutim edhe me Grupet tjera Parlamentare, edhe me mungesë të deputetëve, një mungesë, një teme kaq e rëndësishme që do të jetë në ballafaqim i vërtetë mes opozitës, në mes të nesh si grup dhe kryeministrit nuk do të duhej që të ndodh pa një darkonim të plotë dhe pa pjesëmarrje të deputetëve. Andaj në mungesë të deputetëve, në dakordim edhe me Grupet Parlamentare, po e shtyjmë këtë debat, në Kryesi vendosim për datën”, tha Tahiri.