Gjykata Themelore në Prishtinë i ka shpallur fajtor dy të miturit për rrahjen deri në vrasje të Lulzim Fejzullahut.
Njëri prej tyre është dënuar me 10 vjet burgim, kurse tjetri me 9 vjet burgim.
Dënimi për këta dy të akuzuarit, për xhaxhain e Lulzim Fejzullahut, nuk është i kënaqshëm.
“S’ma plotëson mua zemrën, e para. Dhe e dyta, nuk i besoj, shkurt e shqip, kësaj drejtësie. Nëse më pyetni pse nuk i besoj, njëri prej të akuzuarve i ka pasur edhe dhjetë vepra të mëhershme, e këto nuk e di sa janë marrë parasysh. Kështu që me një fjalë, mua ma kanë lanë varrën hapur, ka thwnw Rrahim Fejzullahu, xhaxhai i të ndjerit.
Nga avokati i familjes Fejzullahu, u tha se do ta shfrytëzojnë të drejtën për ta kundërshtuar vendimin e Gjykatës.
“Ne mund të paraqesim ankesë vetëm për njërin, për atë që është dënuar me 9 vjet burgim, ndërsa për tjetrin nuk mund të paraqesim ankesë, për shkak se fatkeqësisht ligji për të mitur është kështu, dënimi maksimal mund të jetë 10 vjet dhe Gjykata ia ka dhënë 10 vjet burgim apo dërgim në institucionin për të mitur. Mirëpo, ky trup gjykues, këta gjyqtarë, kanë qenë të njëjtit para dy viteve kur njëri prej këtyre dy të miturve, ka qenë i shpallur fajtor dhe nuk është dërguar në institucion për të mitur, por është dhënë dënim me kusht. Dhe kjo poashtu ka qenë një tentim vrasje apo vrasje në tentativë”, tha Gashi.
18 vjeçari më 14 janar në Podujevë, ishte rrahur brutalisht nga dy të miturit, ku ishte dërguar për tretman mjekësor në QKUK, ku edhe vdiq më 20 janar.
Këtë rast Policia fillimisht e pati raportuar si vrasje në tentative dhe therje me thikë, por që në Emergjencë, vdekja e të riut u konstatua nga lëndimet në kokë të marra nga shkopi bejsbollit.
