I dyshuari për plagosjen e trefshitë mbrëmë në Pejë është arrestuar nga Policia e Kosovës të enjten pasdite.
Prokurori i Krimeve të Rënda, Ersan Qavolli thotë se dyshimet janë që përleshja ka filluar rreth një shitblerje të një veture.
Qavolli tregon se i dyshuari është i njohur edhe më herët nga organet e rendit.
“Është një rast i tillë, mirëpo ndaj tij është ngrit aktakuzë për vepër penale rrezikim i trafikut publik me veprime të rrezikshme dhe vepër penale mosdhënia e ndihmës”, ka thënë ai.
E trajtimin mjekësor, të plagosurit po vazhdojnë ta marrin në Qendrën Klinike Universitare të Kosovës.
Sipas anesteziologut Abdullah Hajdari, njëri nga ta vazhdon të jetë në rrezik për jetë për shkak të plagëve që i ka në trup.
“Ai po qëndron i intubuar, dmth është në ventilim mekanik, është në gjendje shumë të rëndë sepse ka lëndime nga arma e zjarrit në regjionin e këmbës së majtë dhe regjionin e barkut të cilat po ia rrezikojnë jetën. Rreth 6 orë është punuar mbrëmë deri në orët e mëngjesit, 4 ekipe të kirurgëve, anesteziologë, kirurgu vaskular, ortopedi, urologu, por të shohim tutje, ende mbetet kritike, është në gjendje të shokut hemorragjik”, ka thënë Hajdari.
E trajtim në klinikat e tjera po marrin edhe dy djemtë tjerë.
“Gjendja e djemve janë në ekzaminim e sipër plotësuese dhe nëse kanë nevojë për trajtim të mëtutjeshëm ne do t’i trajtojmë. Nuk kemi informata shumë të sigurta për ta, ky ka qenë shumë kritik dhe operacione shumë të shpejta ndërsa ata janë ende duke u kompletuar me ekzaminime plotësuese dhe të shohim se në cilën klinikë do të vazhdoj trajtimi i tyre”, tregon Hajdari.
Gjatë së enjtes, nga Forca e Sigurisë së Kosovës kanë konfirmuar se njëri nga të plagosurit është pjesëtar i tyre.
