Janë konfirmuar pesë normat olimpike të xhudistëve të Kosovës, një tjetër arritje kjo e madhe e ekipit që udhëhiqet nga trajneri i madh, Driton Kuka.
Me Kampionatin Botëror në Abu Dhabi që mbyllet të premten, përfundon edhe faza e kualifikimeve për Lojërat Olimpike “Parisi 2024” në xhudo.
“Kosova, gjegjësisht Federata e Xhudos përfundoi garën e fundit kualifikuese për Lojëra Olimpike. Konfirmohen pesë norma olimpike për Lojërat Olimpike për federatën tonë”, ka shkruar kryemjeshtri Kuka në Facebook.
Normat janë fituar nga Distria Krasniqi në kategorinë deri 52 kilogramë, pastaj Nora Gjakova në 57 kilogramë, Laura Fazliu në 63 kilogramë, Loriana Kuka në 78 kilogramë, si dhe Akil Gjakova në 73 kilogramë.
Të pesë xhudistët e Kosovës janë pretendetë për të fituar medalje olimpike në ngjarjen e Parisit që mbahet këtë verë. Kosova, tashmë ka të fituara tri medalje tëe arta olimpike, me Majlinda Kelmendin, Distria Krasniqin dhe Nora Gjakovën.
