Dy gjyqtarë nga Kosova, janë të përfshirë në finalen e Kupës së Maqedonisë të Veriut në futboll, e cila luhet sot prej orës 19:00 në stadiumin “Todor Proeski” në Shkup, ku përballen Tikveshi me Voska Sportin.
Visar Kastrati do të jetë gjyqtari kryesor në dhomën e VAR-it, ndërsa asistent i tij do të jetë Drilon Rexhepi. Në njoftimin e FFK-së, thuhet se ky është caktimi i parë i ekipit të gjyqtarëve të VAR-it në një ndeshje jashtë kufijve të Kosovës.
Po ashtu, kjo finale do të jetë ndeshja e parë që zhvillohet me VAR në Maqedoninë e Veriut dhe një gjë e tillë është arritur falë bashkëpunimit dhe kërkesës së Federatës së Futbollit të Maqedonisë së Veriut bërë FFK-së.
“FFK në krye me menaxherin e VAR-it, Gent Gerdovci, i ka ofruar FFM të gjithë pjesën teknologjike dhe atë teknike për këtë ndeshje finale”, përfundon njoftimi në faqen zyrtare të FFK-së.
