Ballkani dhe Prishtina, do të përballen në finale e Kupës së Kosovës në futboll. Kjo ndeshje luhet sot në stadiumin “Rexhep Rexhepi” në Drenas dhe nis në orën 15:00.
Ballkani vikendin e shkuar u konfirmua kampion i Kosovës për herën e tretë rresht, ndërsa po synon edhe Kupën për ta mbyllur edicionin me dy trofe. Prishtina është fituese në fuqi e Kupës së Kosovës, ndërsa këtë edicion e ka fituar edhe Superkupën e Kosovës, duke e mposhtur Ballkanin në Antalia të Turqisë.
Në fakt, triumfi në Kupë, do t’ia mundësonte Prishtinës daljen në Evropë edicionin e ardhshëm. Kështu që, Kupa e Kosovës është bileta e vetme e Prishtinës për pjesëmarrje në garat e UEFA-s dhe atë kualifikimet në Ligën e Evropës.
Ballkani asnjëherë nuk e ka fituar Kupën e Kosovës dhe nëse e mposht Prishtinën, atëherë në Evropë edicionin e ri do të paraqitet Malisheva si e katërta në Superligë.
Në edicionin e ri, katër skuadra do ta përfaqësojnë Kosovën në Evropë, me Llapin e Dritën që tashmë janë konfirmuar. Po ashtu, fitorja e Ballkanit ndaj Prishtinës nuk do të ishte asistim vetëm për Malishevën por edhe Llapin e Dritën, të cilat automatikisht do të kalonin në raundin e dytë të Ligës së Evropës, përkatësisht Ligës së Konferencës.
Në tetë ndeshjet e fundit mes Ballkanit dhe Prishtinës, ekipi nga Suhareka nuk e ka asnjë fitore. Dy herë ka fituar Prishtina, ndërsa gjashtë ndeshje kanë përfunduar baras.
