Pasi paralajmëroi rikthim të fuqishëm prej edicionit të ardhshëm, te skuadra e Trepçës kanë filluar me ristrukturim.
Të mërkurën, klubi nga Mitrovica, i cili garon në Ligën e Parë të Kosovës në futboll e ka emëruar për drejtor sportiv Rafet Prekazin.
Prekazi është trajner i mirënjohur në Kosovë, ndërsa më herët në postin e drejtorit sportiv ka qenë edhe te skuadra e Gjilanit. Në njoftimin e Trepçës thuhet se organizimi i klubit ka nisur me legjendën e futbollit të Kosovës, Rafet Prekazi, i cili do të ketë detyrë ta kompletoj ekipin për edicionin e ardhshëm.
Te Trepça janë paralajmëruar investime të mëdha për edicionin tjetër, me synimin për t’u rikthyer në Superligë për edicionin 2025/26.
Ndërkohë, Rafet Prekazi është shprehur i lumtur që është rikthyer në ish-klubin e tij. “Jam shumë i lumtur që jam rikthyer në folenë time.
Besoj se kemi të bëjmë me një projekt shumë serioz, ku në momentin e parë që më është prezantuar nuk ka hezituar për të pranuar ftesën ti bashkëngjitëm klubit për t’ia rikthyer namin e dikurshëm skuadrës së Trepçës. Prioritet do të jetë rikthimi në Superligën e Kosovës”, ka thënë Prekazi.
Trepça në edicionin 2009/10 ishte shpallur kampione e Kosovës.
