Presidenti i Serbisë, Aleksandar Vuçiq, i ankohet ambasadorit rus në Beograd për momentet e vështira që sipas tij Serbia është duke kaluar. Sipas të parit të Serbisë, draft-rezoluta e Asamblesë së Përgjithshme të OKB-së për Srebrenicën nuk kontribuojnë në asnjë mënyrë procesit të pajtimit.
Ditën e nisi me ambasadorin rus në Beograd, Aleksandr Bocan Kharchenko.
Në takim me ambasadorin rus, presidenti serb Aleksandar Vuçiq, foli për Kosovën si dhe për draft-rezolutën e Asamblesë së Përgjithshme të OKB-së për Srebrenicën.
Sipas të parit të Serbisë, draft-rezoluta që shpall 11 korrikun si Ditën Ndërkombëtare të Kujtimit të Gjenocidit në Srebrenicë, nuk i kontribuon procesit të pajtimit dhe ndërtimit të besimit në rajon.
Andaj Vuçiq po llogarit në mbështetjen e Rusisë që të parandaloj votimin e kësaj rezolute në Kombet e Bashkuara.
“Theksova se është me interes jetik për vendin tonë që të mbrojë stabilitetin në rajon dhe theksova se lëvizjet arbitrare të Prishtinës dhe iniciativat siç është draft rezoluta e Asamblesë së Përgjithshme të OKB-së për Srebrenicën nuk kontribuojnë në asnjë mënyrë në procesin e pajtimit, duke ndërtuar besim dhe bashkëpunim në rajon”, tha presidenti serb, Aleksander Vuçiq.
Në lidhje me këtë çështje ka reaguar ashpër zëdhënësi i bllokut evropian, Peter Stano.
Nga Brukseli, Stano tha gjenocidi në Srebrenicë nuk është çështje opinioni.
“Nëse është kryer gjenocid në Srebrenicë apo jo nuk është çështje opinioni, sepse vendimet e Gjykatës Ndërkombëtare për ish-Jugosllavinë dhe organeve të tjera, Gjykatës Ndërkombëtare të Drejtësisë, treguan qartë se ishte kryer gjenocid në Srebrenicë”, ka thënë zëdhënësi i BE-së, Peter Stano.
Tutje diplomati sllovak tha se nuk ka vende për ata në Evropë që e mohojnë gjenocidin në Srebrenicë.
“Por kur bëhet fjalë për gjenocidin në Srebrenicë, pozicioni i Bashkimit Evropian dhe institucioneve të tij është shumë i qartë dhe është bërë i ditur çdo herë në ditën e asaj ngjarjeje të tmerrshme në historinë evropiane. Prandaj, të gjithë duhet ta pranojnë dhe ta respektojnë dhe nuk ka vend në Evropë për ata që do ta vënë në dyshim”, u shpreh Stano.
Përkundër aktgjykimeve të gjykatave ndërkombëtare të cilat vërtetojnë se në Srebrenicë në vitin 1995 ishte kryer gjenocid ndaj boshnjakëve, Serbia nuk e pranon këtë dhe karakterizon ngjarjen si një krim të përmasave masive.
