Ministri i Punëve të Brendshme, Xhelal Sveçla, ka vizituar policin Januz Veselaj, i cili ditë më parë është plagosur derisa po intervenonte në një vjedhje në një kishë në Zllakuqan.
Sveçla ka përgëzuar policin për reagimin e shpejtë dhe profesional, gjithashtu edhe për rezistencën përballë plaçkitësve që ia rrezikuan jetën.
Sveçla ka potencuar se polici Veselaj e kishte gjendjen të rënduar, por rikuperimi po i vijon mirë.
Ndërkohë, tha se kryesit e këtij akti do të përballen me gjithë forcën e ligjit.
“Hetimet në identifikimin e kryesve të tentim vjedhjes dhe plagosjes së Januzit janë duke u zhvilluar me intensitet të lartë. Kryesit e këtij akti dhe kushdo që do të tentojë të kryejë akte të tilla, do të përballet me gjithë forcën e ligjit”, ka shtuar ministri.
Gjatë vizitës Sveçla ka qenë nën shoqërimin e drejtorit të Policisë së Kosovës, Gazmend Hoxha./teve1.info/
