Ai ka thënë se në intervalin kohor 19-23 prill 1999, në fshatrat Grashticë dhe Makoc të Prishtinës u vranë dhe u masakruan 153 shqiptarë të pafajshëm nga forcat ushtarake, policore dhe paraushtarake serbe.
“Civilët shqiptarë, kryesisht të rinj, por edhe gra, fëmijë e pleq, u ndanë nga kolona, u pushkatuan dhe u masakruan përgjatë rrugës që përshkon këto fshatra dhe në disa oborre e shtëpi të fshatit Makoc. Vala e vrasjeve masive të popullatës shqiptare vazhdoi edhe në fshatin Hallaq të Vogël të Lipjanit, ku forcat pushtuese serbe më 19 prill 1999 vranë e masakruan 20 banorë të këtij fshati dhe 6 të tjerë nga fshati Vërshec, të cilët kishin ardhur për t’u strehuar. Gjatë atyre ditëve të trishta, Malësia e Marecit ishte shndërruar në arenë luftimesh të përgjakshme mes njësive të Ushtrisë Çlirimtare të Kosovës dhe forcave pushtuese serbe. Në Betejën e Marecit, duke mbrojtur popullatën e strehuar në fshatrat e Gollakut, ranë dëshmorë 27 luftëtarë dhe 16 martirë”, ka shkruar Konjufca.
Tutje Konjufca ka thënë se kujtimi për dëshmorët dhe martirët e lirisë, gjithmonë do të jetë në kujtesën tonë të lavdishme kombëtare, shkruan teve1.info
“Kujtimi për dëshmorët dhe martirët e lirisë, gjithmonë do të jetë në kujtesën tonë të lavdishme kombëtare. Ndërsa sakrifica sublime e tyre mbetet obligim i yni për ta bërë Kosovën ashtu siç e dëshiruan dëshmorët dhe martirët”, ka shkruar Konjufca në Facebook.
“Ata janë të gjallë dhe nuk harrohen as nuk vdesin kurrë. Lavdi!”, shtoi ai.
