Nga fshatrat e Gjakovës, me këta kuaj arritën në qendër të qytetit.
E para fillimit të manifestimit në nder të përurimit të shtatores së Gjergj Kastriotit Skënderbeut, erdhën edhe figura të ndryshme politike.
Nuk vonoi shumë, shtatorja u zbulua nga donatori dhe pjesëmarrësit e tjerë të ceremonisë.
Ideatori dhe donatori i këtij projekti, Gjergj Prenkoçaj, u emocionua gjatë fjalimit të tij para të pranishmëve.
“Unë u mundova sado pak që t’ia lajë një borxh vendlindjes, vendit ku u rrita, Gjakovës time që sot është më e bukur dhe krenare se kurrë”, ka deklaruar ai.
E kryetari i Gjakovës, Ardian Gjini tha se qyteti tashmë do të marrë pamje tjetër.
“Gjakova njihet mirë, Gjakova është një copë e Kosovës, është një copë e shqiptarëve dhe Shqipërisë, gjithmonë kemi qenë këtu dhe kemi me qenë këtu, por sot e kemi edhe një derdhje në bronz që ka me jetu sa të jetë jeta”, ka thënë ai.
I pranishëm ishte edhe i pari i AAK-së, Ramush Haradinaj.
Ai ngriti lartë këtë veprim të donatorit.
“Në Gjakovë buron shumë vlerë kombëtare, buron fuqi për kombin, për shqiptarët, jo ndër vite po ndër shekuj. Unë siguroj se Gjergji është pikërisht aty ku duhet”, ka thënë Haradinaj.
Vlerësim pozitiv dhanë edhe disa qytetarë.
“Shumë bukur e gëzofshi të gjithë populli shqiptar”.
“Është kënaqësi e madhe për kombin shqiptar”.
Mirëpo kishte edhe nga ata që shfaqën pakënaqësi, si ky qytetar që kishte ardhur nga Zvicra enkas për këtë ngjarje.
“Ton ky nder me u ba, me u ba pak ma hijshëm. Unë prej Zvicre kam ardh ekstra, edhe me dal më 6 maj në Prishtinë në manifestim, për këto dyja kam pagu biletë vetëm për nder të kombit”.
Gëzimin për vendosjen e monumentit në qendër të qytetit, gjakovarët e vazhduan nën tingujt muzikor dhe valleve.
