Ministrja e Drejtësisë, Albulena Haxhiu ka thënë se në cilësinë e Koordinatores Kombëtare kundër dhunës në familje, dhunës ndaj grave dhe dhunës me bazë gjinore, javën e kaluar u është drejtuar 38 kryetarëve të Komunave me kërkesën për zbatim të obligimeve që dalin nga Strategjia kundër dhunës.
Haxhiu tha se “krahas angazhimit nga niveli qendror, janë rreth 40 obligime që duhet të adresohen nga komunat ashtu që sipas saj, të kontribuohet përmbajtësisht në parandalimin dhe mbrojtjen nga dhuna në familje dhe ajo me bazë gjinore”.
Derisa renditi edhe disa obligime të cilat sipas saj duhet të trajtohen me urgjencë.
“Me urgjencë duhet të veprohet në këto obligime:
Të mbështeten për pavarësim financiar viktimat e dhunës në familje: Duke mbuluar pagesën për qera, Duke mbuluar shpenzimet mujore për të mbijetuarat, Subvencionimi i pagesave për kopshte të fëmijëve të viktimave të dhunës në familje dhe dhunës ndaj grave, Të pajisen me detektor të sigurisë të gjitha strehimoret dhe QPS-të nga komunat, Të shtohen kapacitetet njerëzore dhe profesionale në QPS, bazuar në analizën që ka bërë Ministria e Drejtësisë në të gjitha Komunat, Shtrirja e qasjes shumë-sektoriale të koordinuar të trajtimit të dhunës në familje dhe dhunës ndaj grave në mbarë Kosovën, përmes themelimit të Mekanizmave Koordinues në komunat ku mungojnë, Informimi i viktimave/të mbijetuarave të dhunës në familje e dhunës ndaj grave, si dhe publikut në tërësi, mbi të drejtat e tyre dhe shërbimet ku mund të marrin ndihmë, përfshirë ndihmën juridike falas për personat e ekspozuar ndaj dhunës, në një gjuhë që ato/ata e kuptojnë; Mbështetja e strehimoreve me financim të vazhdueshëm”, tha Haxhiu në Facebook.
Tutje Haxhiu shtoi se për të ofruar siguri dhe mirëqenie për vajzat dhe gratë, veprimi duhet të jetë i përbashkët dhe ndërinstitucional.
E në këtë drejtim, ministrja uroj që të gjithë kyetarët të reflektojnë mbi politikat lokale dhe të zbatojnë obligimet që dalin nga Strategjia../teve1.info./
