Eksperti i Politikave, Sigurisë dhe Gjeopolitikës, Ilir Kulla, ka rrëfyer për herë të parë se si i shpëtoi dy pengjet italiane, siç i quan ai “dy Simonat” në Irak, raporton teve1.info
Në emisionin më të ri në Tëvë1, Ilir Kulla, ka rrëfyer disa detaje të kësaj ngjarjeje.
“Po të mos ishte që mediet italiane do të nxirrnin një foto timen me të ndjerin Gjeneral Kalipa që u vra në Irak nga ushtarët amerikanë, pa dashje një vit më vonë, ndoshta roli im s’do të kishte dalë kurrë në publik. Por pastaj gjërat u hapën. Por konteksti në të cilin unë e kam bërë dhe në të cilin unë jam futur si negociator brenda, është një gjë të cilën unë mendoj se akoma nuk mundet dhe nuk duhet ta bëjë se ka akoma shumë njerëz gjallë. Mendoj që ndoshta në një nga seancat e ardhshme edhe mund ta them. Por ajo është një periudhë shumë delikate, unë kam ndenjur për gati 40 ditë vetë në atë rajon pa lëvizur derisa ato dy vajzat u kthyen në shtëpinë e tyre në Itali”, rrëfeu Kulla.
Ai tregoi për Tëvë1 se një nga vajzat e shpëtuara, Simona Pari, kishte qenë edhe në Kosovë me mision pas luftës me një nga organizatat ndërkombëtare.
Ndërsa, i pyetur nëse ai ka lidhje edhe me ish-Myftiun e Sirisë, Ahmet Kiftaro, Kulla tha se ka lidhje vëllazërore, derisa shtoi se në çështjen e dy Simonave, kjo familje i ka dhënë shumë ndihmë.
“E kam njohur, ka qenë njeri i jashtëzakonshëm dhe vazhdoj të kem miqësi shumë të mirë me familjen, djalin dhe nipat e tij. Unë di të them që kam një lidhje vëllazërore, shpirtërore dhe di të them që në çështjen e dy Simonave në mënyrë të veçantë ka pasur rol ajo familje e cila mua më ka vënë në dispozicion vetën dhe duhet konteksti i kohës duhet përshkruar”, tha ai.
