Kryesuesi i Kuvendit Komunal në Mitrovicë të Veriut, Nexhat Ugljanin ka thënë se dalja e ulët e qytetarëve në votimin e sotëm në komunat veriore të vendit është një dështim për bashkësinë ndërkombëtare.
Ugljanin ka vlerësuar se ndërkombëtarët duke qenë garantues dhe duke i dhënë një rëndësi të madhe këtij procesi, sot kanë marr një autogol, njësoj si subjekti më i madh politik që përfaqëson shumicën serbe.
“Vetë thirrja nga subjekti politik, por edhe thirrja e Republika e Serbisë nga kryetari i Serbisë që ka ardhur përmes medieve bojkotimi edhe u realizua. Vendimi i krizës në veri të Kosovës është e vetmja arsye që e ka marrë përsipër lista serbe për bojkotimin dhe sigurisht qe duhet me qenë përgjegjës për këtë vendim para sidomos ndërkombëtarëve sepse sigurisht që ka pasur një lloj garancioni nga ndërkombëtarët që ky proces do të kryhet sipas udhëzimit administrativ. Është një dështim edhe për bashkësinë ndërkombëtare në këtë proces. Është një autogol për subjektin politik që përfaqëson shumicën serbe ashtu edhe për bashkësinë ndërkombëtare që i ka dhënë shumë rëndësi këtë procesi” është shprehur Ugljanin në një lidhje direkt për TËVË 1.
Ndërkohë, ai ka konsideruar se institucionet përkatëse të Kosovës i kanë kryer të gjitha detyrat obligative për këtë proces
“Institucionet tona përkatëse i kanë kryer detyrat obligative, sidomos komisioni zgjedhor po edhe komisioni komunal, edhe policia në aspektin e sigurisë. Ne do të vazhdojmë deri në fund të mandatit që me detyrat tona të jemi në shërbim të qytetarëve”, ka shtuar ai.
