Gazmend Zhitia, pronari i kompanisë “Zhitia Tours”, ka dhënë detaje të reja për ndalimin e kosovarëve në kufi me Serbinë.
Zhitia ka bërë të ditur se prej 261 pasagjerëve që ka pasur kompania e tij, 23 prej tyre janë ndaluar nga policia në kufi.
“Ndalimi i autobusëve ka filluar prej orës 22:00, për disa tjerë që mbërrijnë më herët në vend kalimin kufitar me Serbinë, ndërsa sa i përket autobusëve të kompanisë sonë prej orës 01:15 të natës. Policët i kanë mbledhur dokumentet normal si gjithë, qysh e punojnë punën e vetë. Prej krejt atyre 261 pasagjerë që kanë qenë duke udhëtuar me neve 23 prej tyre i kanë marrë në një lloj interviste. Ofertën e fundit që na kanë dhënë neve rreth orës 12:00 ka qenë, letë mbesin këta 23 persona këtu, ju mundeni me vazhdu rrugën. Thjesht, ata mua më kanë thënë personalisht ata që kanë qenë pjesëmarrës së luftës ata duhet me i verifikua. Mendimi im është që ne të gjithë kemi qenë pjesëmarrës së luftës, është një e padrejtë shumë e madhe”, deklaroi ai në emisionin “Ditari” në Tëvë1.
Ai tha se kosovarët e ndaluar kanë janë marrë në pyetje për pesë minuta, pastaj janë kthyer dhe kanë qëndruar te policia.
I pyetur se pse i kanë ndaluar për 15-16 orë, ai tregoi se policët serbë kanë thënë se janë duke pritur urdhër nga Beogradi se kur t’i lirojnë udhëtarët.
“Përgjigja e tyre ka qenë ne presim urdhrin prej Beogradit, pa na dhënë ata urdhrin me vazhdua ju rrugën, nuk mundemi ne me ju lirua. Në suazat njerëzore e kanë thënë edhe këtë që është një lloj verifikimi, por sido qoftë në rrugë 15:00 vazhduan rrugëtimin ata që ishin në dalje dhe në hyrje të Serbisë. Në një mënyrë e kemi konfirmuar që kjo ka të bëjë me politikën, e pranojnë edhe ata vetë. Ata e kanë zbatuar urdhrin prej Beogradi”, shtoi ai.
Qindra kosovarë janë mbajtur të bllokuar për mbi 16 orë nga autoritetet serbe në pikat kufitare me Serbinë.
Serbia ka ndaluar autobusë me udhëtarë nga Kosova edhe në kufijtë me Kroacinë dhe Hungarinë, si shenjë hakmarrjeje ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë.
Gjatë ditës, MPJD u ka bërë thirrje qytetarëve të vet që të shmangin “me çdo kusht” kalimin nëpër Serbi./teve1.info/
