Kryeministri i Kosovës, Albin Kurti, ka thënë se edhe pas 30 javësh që kur Milan Radoiçiqi ka marrë pjesë në sulmin terrorist në Banjskë, ku u vra rreshteri afrim Bunjaku, nuk ka ende aktakuzë nga Prokuroria e Shtetit për të.
Sipas Kurtit, mungesa e aktakuzës ndaj tij do të duhej të problematizohej qysh në fillim.
“Sot po hymë në javën e 30-të prej kur kryekrimineli Milan Radoiçiq, i sanksionuar nga Shtetet e Bashkuara dhe Mbretëria e Bashkuar, ende nuk ka aktakuzë nga Prokuroria e Shtetit për sulmin terrorist në të cilin na e vrau rreshterin Afrim Bunjaku. Sulm terrorist për të cilin ai pranoi publikisht pjesëmarrjen dhe autorësinë. Edhe java e tretë po të ishte pa aktakuzë do të duhej të problematizohej, lëre më java e 30 në të cilën hyjmë sot”.
“Pas 24 vjetëve në komunat në veri të vendit janë hapur e funksionalizuar zyrat e agjencisë së regjistrimit të bizneseve të Kosovës dhe të kadastrave komunale në shërbim të qytetarëve dhe të bizneseve të ligjshme”, ka thënë Kurti të dielën në mbledhjen e Këshillit të Përgjithshëm të Lëvizjes Vetëvendosje./teve1.info/
