Te varri i vëllait erdhi për ta kujtuar.
Në Kleçkë të Malishevës, aty ku prehet dëshmori Ibrahim Mazreku, Ajshe Bytyçi lutet për shpirtin e tij.
Ajo kujton edhe momentin e fundit kur u panë, para se të iknin në Shqipëri.
“Ma s’mrami i ka ardhë keq prej nanës vet me i thanë dilni se dolën krejt. I thashë çka ka, tha ja ja veç erdha me ju pa, herën e fundit që na ka pa. Nana u ngushtu shumë, po çka me ba, i tha bre djali jem ku me shku na? Nanë tha, dilni se po thonë me shku ju në Shqipëri, e na sa të mujmë kemi me ju mbrojtë”, shprehet Ajshe Bytyqi, motra e dëshmorit.
Mirëpo gjatë luftimeve me forcat serbe në fshatin Senik të Malishevës, Ibrahim Mazreku ra dëshmor.
Ndërsa në çastet e tij të fundit, përballë Ibrahim Mazrekut me të ishte ish-komandanti i Togut të Parë, Besim Gashi.
“Kemi qenë në fshatin Senik, ka pasë luftime shumë intensive. Ibrahim Mazreku ka ra atë ditë. Ka ndërru jetë në duart e mia. Për neve ka qenë thyerje e madhe sepse ai ka qenë ndër komandantët më të dalluar të njësiteve speciale të UÇK-së”, thotw Besim Gashi, ish-komandant i Togut të Parë.
Kurse lajmi për rënien e tij e kishte tronditur familjen e cila ndodhej në Shqipëri.
“Kur e nijtëm për të lajmin u mërzitëm shumë, po u duhke nanës me i dhanë gajret e shoqes, fëmijëve me ju thanë jo se ka Ibrahima shumë, nuk është baba juaj”, shprehet motra e tij.
Ibrahim Mazreku është varrosur në Kleçkë, me nderime ushtarake me 2 qershor 1999, ndërsa është rivarrosur më 14 Gusht të vitit 2000, në Varrezat e Dëshmorëve, po në Kleçkë.
