I gjithë monitorimi i objektit u bë për shkaqe sigurie.
Kjo për arsye se zyrtarët e Agjencisë për Administrimin e Pasurisë së Sekuestruar, vazhduan aksionin edhe të premten për sekuestrimin e pasurisë së krijuar në mënyrë të paligjshme të Millan Radojiçiq, përgjegjësin e sulmit të 24 shtatorit në Banjskë.
Përveç restaurantit “Grey”, në Mitrovicë të Veriut, kamerat e sigurisë dhe bllombat e sekuestrimit, u vendosën edhe aty ku deri para pak kohësh ka qëndruar, Radojiçiq.
Aksioni vazhdoi edhe në vilën buzë “Ujmanit”.
Aty erdhën edhe ministrant, Xhelal Sveçla dhe Albulena Haxhiu.
Ministrja e Drejtësisë tha se pasuria multimilonëshe e Radojiçiq, i kaloi shtetit.
Sipas saj, disa nga veturat e konfiskuara, u janë dhënë Policisë së Kosovës për shfrytëzim, Haxhiu lë të nënkuptohet se edhe vila luksoze mund të bëhet pronë e Policisë.
“Kemi një aktvendim të konfirmuar edhe nga departamenti special, dhe gjykata e Apelit, për disa pasuri të paluajtshme, por edhe të luajtshme se ka vetura të tjera, të cilat janë te sekuestruara, dhe një nga këto pasuri të paluajtshme është edhe kjo vila mbrapa nesh… ka banesa, ‘Pent House’ po ashtu restoranti, vetura varka apo barka, apo anija, dhe të gjitha këto janë nën menaxhim të Ministrisë së Drejtësisë. Besoj që nëse dikush e meriton hapësirë apo prioritet në këtë drejtim, natyrisht janë Policia e Kosovës”, tha ministrja Haxhiu.
Përveç policisë e cila po kujdeset për këtë pronë, aty u vendosen edhe kamerat e sigurisë, ndërkaq Haxhiu tregoi për vizitën e saj dhe të ministrit Sveçla.
“Tashmë kjo vilë ka kamerat e vendosura të sigurisë. Për të përcjell secilin detaj secilën lëvizje, dhe për të parandaluar çfarëdo përpjekje për të penguar punën e zyrtarëve por e Policisë së Republikës së Kosovës, përveç kamerave janë edhe Policia duke qëndruar këtu për aspekte të sigurisë”, shtoi ajo.
Ky aksion i Agjencisë për Administrimin e Pasurisë së Sekuestruar, u asistua nga policia e rajonit veri.
“Policia edhe sot ka asistuar Agjencinë për Administrim të Pasurisë së Sekuestruar, kanë pasur aktivitet të tyre por nuk ka pasë diçka të re, por nuk është sekuestruar ndonjë pronë e re. situate pas Banjskës ka ndikuar shumë, transparenca me qytetarët që ata të jenë të qetë”, tha zëvendësdrejtori i Policisë së Kosovës për rajonin e veriut.
Ky aksion për sekuestrimin e pasurisë së Radojiçiq, përfundoi nën rrezet e diellit dhe bukurisë së liqenit të “Ujmanit”.
