Në mesditën e së enjtes, iu drejtuan zyrës së pensioneve në Drenas.
Por, këtu u njoftuan se kjo zyre është mbyllur përkohësisht.
Disa muaj me parë, punëtori i kësaj zyre, kishte ndërruar jetë.
E fillimisht, ai ishte zëvendësuar me dy praktikante të tjera.
Por, që nga e premtja e javës së kaluar, në derën e Zyrës së Pensioneve në Drenas, është vendosur ky njoftim.
Këtu pensionistët udhëzohen që për shërbimet e tyre, t’i drejtohen zyrës në Prishtinë.
E kjo ka bërë që për një javë, shumë të moshuar të kthehen nga këtu pa kryer punë.
“A punojnë nesër? Jo. Hajde përhajr koftë”, u shpreh Trafil Elshani, pensionist nga Drenasi.
E duarbosh nga këtu u kthye edhe një qytetar tjetër.
“Erdha me pyet, po kurrfarë përgjigje, u ba që një muaj, me tha që brenda tri ditë i çojmë, po s’kemi përgjigje”, Nazmi Karaqa, qytetar nga Drenasi.
E një tjetër pensionist, thotë se nuk e kanë idenë se ku duhet të lajmërohen në Prishtinë.
“Kjo është katastrofë, katastrofë për pensionistë, katastastrofë për zyrtarë për zyrtarë, komunal a qeveritar, kushdo që i ka në duar këto sene”, tha Brahim Aliu.
Zgjidhje sa më të shpejtë për pensionistët, po kërkon edhe drejtori i Qendrës Për Punë Sociale në Drenas, Ilmi Dobra.
Ky sqaron se zyra për pensione, ishte në kuadër të nivelit qendror.
“Faktikisht, prej të premtes ajo zyre është mbyllë. Arsyen pse, nuk e di as unë. Sa i përket kërkesave e problemeve, janë shumë të mëdha. Vërtetë është maltretim i kësaj shtrese më të ndjeshme. Të vijnë pleqtë këtu e të sillen këndej e të mos kryejnë punë dhe nuk e dinë se ku duhet me u orientuar e as ku me shkuar”, shprehet Dobra.
Për arsyen e mbylljes së kësaj zyre Tëvë1 ka kontaktuar edhe me Zyrën Rajonale të Pensionistëve në Prishtinë.
Udhëheqësi i kësaj zyre, Enver Bikliqi, ka thënë se deri në gjetjen e një zgjidhjeje, zyra do të hapet vetëm të premteve.
Ndërsa rastet emergjente, duhet t’i drejtohen zyrës së pensionistëve në Prishtinë.
