Gruaja që u publikua në medie dje se i sulmoi dy gazetare të Lajmi.net, është ndaluar për 48 orë, raporton teve1.info
Njoftimin e bëri të ditur përmes një komunikate për medie, vet Prokuroria Themelore në Prishtinë.
Sipas Prokurorisë, e dyshuara M.B. akuzohet për veprën penale “Kanosje” dhe “Lëndim i lehtë trupor”.
“Prokuroria Themelore në Prishtinë, njofton opinionin publik lidhur me sulmin ndaj të dëmtuarave-gazetareve se, pas ndërmarrjes së veprimeve hetimore dhe grumbullimit të provave shtesë, si dhe riintervistimit të njërit nga të dyshuarit, Prokurori i Shtetit ka lëshuar aktvendim mbi ndalimin e M.B., e dyshuar për shkak të veprave penale “Kanosja” dhe “Lëndimi i lehtë trupor”, sipas KPRK-së. E njëjta është dërguar në mbajtje në kohëzgjatje prej 48 orësh, derisa është intervistuar edhe një person i dyshuar i përfshirë në këtë rast. Po ashtu, në këtë çështje penale janë marrë deklaratat e palëve të dëmtuar dhe në koordinim me policinë janë duke u ndërmarrë veprime të tjera hetimore”, thuhet në komunikatën e Prokurorisë.
