Në Dhomat e Specializuara të Kosovës (DhSK) në Hagë është ndërprerë seanca gjyqësore ndaj Hashim Thaçit dhe të tjerëve, derisa në sallën e gjyqit të jenë të pranishëm të gjithë të akuzuarit.
Kryetari i trupit gjykues, Charles Smith III tha se seanca pritet të rifillojë kur të gjithë të akuzuarit të jenë në sallë, raporton “Betimi për Drejtësi”.
“Do ta ndërpresim seancën derisa të jenë të gjithë të akuzuarit në sallë”, tha Smith III, duke shkuar më pas në pushim.
Përpara kësaj, seanca ishte e mbyllur për publikun dhe nuk dihet se çfarë u tha në sallë.
Kujtojmë se Jakup Krasniqi ishte i pranishëm në seancë përmes video-lidhjes ndërsa Thaçi, Veseli dhe Selimi, ishin fizikisht.
Në Dhomat e Specializuara të Kosovës (DhSK) në Hagë, edhe të enjten po vazhdon dëshminë dëshmitari i 54-të i Zyrës së Prokurorit të Specializuar me kodin W04739 në gjykimin ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Ashtu si në ditët paraprake, edhe sot dëshmia e këtij dëshmitari është duke u dëgjuar në seancë të mbyllur për publikun, raporton “Betimi për Drejtësi”.
Përpara se të fillohet me dëshminë e këtij dëshmitari, kryetari i trupit gjykues, Charles Smith III dha një urdhër gojor lidhur me vonesat që kanë bërë palët në shtimin e materialeve në listën e prezantimit të tyre.
“Vërejmë që janë shtuar shumë materiale me vonesë në listën e prezantimeve të palëve edhe nuk janë paraqitur pothuajse fare arsye për këto vonesa në shtimin e këtyre materialeve. Trupi gjykues dëshiron të theksojë që në përputhje me afatet që gjenden në urdhrin për zhvillimin e gjykimit, duhet dorëzuar në kohë dhe kur shtohen me vonesë materialet, pala duhet të japë edhe arsyet pse është shtuar me kaq vonesë një material dhe pse nuk është shtuar më përpara”, tha ai.
Smith shtoi se trupi gjykues thekson se duhet të përpiqen më shumë palët që kur të dorëzojnë dokumentet, lista të jetë në formën e vet përfundimtare.
Në këtë seancë, të gjithë të akuzuarit janë të pranishëm fizikisht në sallën e gjyqit përveç, Jakup Krasniqit i cili po e ndjek përmes video-lidhjes.