Kosova dhe Mali i Zi kanë nënshkruar marrëveshjen për Programin e Bashkëpunimin Ndërkufitar IPA lll për vitet 2021-2027.
Pas nënshkrimit, zëvendëskryeministri Besnik Bislimi, ka thënë se kjo marrëveshje u mundëson vendeve që të përftojnë përkrahje nga Bashkimi Evropian me një shumë prej 8.4 milionë euro.
Qëllimi i këtij programi, Bislimi tha se është promovimi i fqinjësisë së mirë, nxitja e integrimit drejt BE-së dhe zhvillimi social dhe ekonomik i zonave ndërkufitare.
“Në arritjen e këtij qëllimi, fokusi dhe prioritetet tematike të përzgjedhura do të jenë: punësimi dhe mobiliteti i fuqisë punëtore përfshirë atë sociale dhe kulturore me një proporcion prej 40 për qind të fondit. Turizmi dhe trashëgimia kulturore dhe natyrore me rreth 50 për qind të mjeteve të fondit dhe tre promovimi i qeverisjes lokale dhe rajonale me diku 10 për qind të fondeve të alokuara”, ka thënë ai.
Ndërsa ministrja për Çështje Evropiane e Malit të Zi, Majda Gorçeviq, ka thënë se shteti i saj do ta përkrahë anëtarësimin e Kosovës në Këshill të Evropës në maj, ndërsa ka komentuar edhe votën kundër në Paris e para pak ditëve.
“Në këtë rast dua të përkujtoj se pavarësisht për drejtat e subjektit politik, shumica e parlamenteve kanë nënshkruar marrëveshje koalicioni. Me këtë marrëveshje parashihet përkrahja e Kosovës. Dua të nënvizoj Mali i Zi në këshillin ministror, në maj, do të përkrahë Kosovën”, ka thënë ajo.
Ndërkohë, zëvendëskryeministri Besnik Bislimi ka thënë se nuk ka votuar Mali i Zi kundër Kosovës, por një deputete që përfaqëson një subjekt politik.
“Kjo nuk është diçka risi edhe ne kemi në Kosovë, në parlamentin e Kosovës subjekte politike siç janë Lista Sërpska që punojnë dhe veprojnë kundër interesave të shtetit të Kosovës. Ajo që është me rëndësi është që vota e zonjës Vukiçeviq nuk përfaqëson qëndrimin zyrtar të Republikës së Malit të Zi i cili nuk ka ndryshuar që nga data 9 tetor të vitit 2008 e kur Mali i Zi ka vendosur ta njohë Republikën e Kosovës”, u shpreh ai.
Më 27 mars në Asamblenë Parlamentare të KiE-së, u përkrahë raporti i raportueses për Kosovën në Këshillin e Evropës, Dora Bakoyannis për anëtarësimin e Kosovës në këtë trup.
