Deputetja e Lëvizjes Vetëvendosje, Jeta Statovci, tha se partia e saj e ka komoditetin për ta përfunduar mandatin, e njëherit për t’u sfiduar me zgjedhje të reja.
Në kuadër të diskutimit për zgjedhjet e parakohshme në këtë vit, Statovci tha se një gjë e tillë mund të ndodhë vetëm me harmonizim të tërë spektrit opozitar për të shpërbërë Kuvendin e Kosovës.
“Ne e kemi komoditetin për të vazhduar, e kemi rehatinë dhe numrat dhe komoditetin e brendshëm politik për të vazhduar e për të çuar këtë mandat deri në fund. Mirëpo, gjithashtu e kemi edhe komoditetin për t’u sfiduar në zgjedhje kurdo që është e nevojshme. Kjo mund të bëhet vetëm me një harmonizim të tërë spektrit opozitar për të shpërbërë Kuvendin. Çështja e zgjedhjeve është e qartë që është çështje muajsh, por se kur dhe qysh është çështje e procedurave”, deklaroi Statovci në emisionin “Infonata”.
E pyetur se në qoftë se opozita e sjell mocionin, a janë të gatshëm për ta votuar, deputetja tha se në rast se ka vota të mjaftueshme, janë absolutisht të gatshëm./teve1.info/.
