Dinari serb, po vazhdon të jetë krye-temë.
Të hënën, për të u diskutua edhe në takimin e kryenegociatorëve në kryeqendrën evropiane.
Por, kryeparlamentari, Glauk Konjufca mbetet i palëkundur në qëndrimin e tij, se për dinarin, vendosin institucionet e Kosovës.
“Kosova është plotësisht në të drejtën e saj dhe është një çështje që sa i përket legjitimitetit të vet vendimit nuk ka kerkush vërejtje, nuk ka kerkush kritika. Vendimi është i Kosovës dhe është i duhuri dhe është ajo që na është nevojitur”, ka thënë Konjufca.
Megjithatë, Konjufca thotë se opsioni më i mirë janë zgjedhjet.
“Ju e dini që moti jam për zgjedhje, kam thënë që opsioni më i mirë është që të shkohet në zgjedhje por tash të gjithë po thonë që është këtë vit. Ka edhe disa muaj, nuk mund të them se cila është koha e duhur për të shkuar në zgjedhje. Edhe kryeministri ka thënë do të ishte në mbështetje të një iniciative të opozitës sa i përket shkuarjes në zgjedhje, duhet të ulemi se cila është koha më e përshtatshme”, ka thënë kryeparlamentari.
E analisti nga Shqipëria, Ben Andoni thotë se Kosova gjendet përballë presionit për çështjen e Asociacionit, për atë kryeministri Kurti shpesh tërhiqet nga vendimet që i merr.
“Ky është problem shumë i madh në sensin që tashmë të paktën drafti Asociacionit përkundrejt asaj që thuhet në Kosovë , duhet të ishte në Gjykatën Kushtetuese të Kosovës, për t’u qenë sa më i saktë dhe sa më i pacenueshëm për rëndin e brendshëm të Kosovës. Por ne po humbim kohë, po humbim kohë pa fund me këtë lloj retorike”
Ndërkohë, Bashkimi Evropian javën e kaluar ka thënë që po punohet për aranzhimin e një takimi të nivelit të lartë në Bruksel.