Pas takimit me kryetarin e kësaj komune, Bedri Hamza, kryetarja e shtetit tha se duhet të trajtohen sfidat në interes të mitrovicasve.
“Ka nevojë për sa më shumë përkrahje. Trajtimi i nivelit të papunësisë do të mund të bëhet edhe me investime brenda Kosovës, por edhe me investime nga jashtë Kosova. Jemi duke bërë çmos që të rritet numri i investitorëve nga jashtë, sidomos investimet që fokusohen në krijimin e vendeve e reja të punës. Mitrovica duhet të jetë ndër qytetet prioritare, sepse e ka edhe potencialin për një gjë të tillë. Nga potenciali në investimin e sektorit të energjisë, e deri në investimet në sektorin e turizmit, sidomos në rajonin e Shalës së Bajgorës”, ka deklaruar Osmani.
Më tej, ajo tha se në takimin me kryetarin e Mitrovicës është diskutuar edhe çështja e mbrojtjes së ambientit.
I pari i Mitrovicës, Bedri Hamza tha se para presidentes ka paraqitur prioritet që ka gjatë udhëheqësisë së tij.
“Biseduam për gjendjen në komunën e Mitrovicës. Është një gjendje më specifike, më e ndjeshme se në komunat tjera. Edhe në aspektin politik, edhe të sigurisë, edhe të çështjeve të tjera. Me fokus të veçantë për projektet të cilat duhet të zhvillohen në Mitrovicë, janë duke u zhvilluar në Mitrovicë dhe për prioritet tona që i kemi caktuar që janë, arsimi, shëndetësia, kultura, rinia, sporti dhe ambienti pa i anashkaluar edhe prioritetet tjera në infrastrukturë në përputhje me mundësitë tona financiare”, ka thënë ai.
“Sigurisht se iu drejtuam presidentes me lutjen dhe me kërkesën që takimet me investitorët, edhe pse ne jemi të sigurtë që presidentja këtë e bën gjithmonë, t’i përdor edhe për kanalizimin e mundshëm potencial të vijnë e të investojnë në Mitrovicë. Që të këtë një përkrahje më të madhe përmes financimit të projekteve të caktuara nga niveli qendror”, ka shtuar Hamza.
Gjatë vizitës në Mitrovicë, presidentja Vjosa Osmani ka vendosur lule tek pllaka përkujtimore në lagjen e Kovaçëve. Po ashtu, do të vizitojë edhe shkollën fillore të mesme të ulët “Ismail Qemali”./KP
