24 hektarë tokë përreth manastirit të Deçanit tashmë janë regjistruar si pronë e objektit fetar serb.
E luftën ligjore për këtë tokë, ky manastir e ka bërë që nga vitet e pasluftës.
E një ditë pasi mirëpriti regjistrimin e kësaj toke si pronë te Manastirit, emisari amerikan Gabriel Escobar erdhi vet për të vizituar këtë vend.
Bashkë me të ishte edhe ambasadori amerikan në Kosovë, Jeffry Hovenier.
Në derën kryesore të këtij objekti fetar i priti Sava Janjiq.
Pavarësisht që takimi zgjati mbi një orë e gjysmë, kur dolën jashtë nuk u deklaruan për media.
Megjithatë, disponimi ishte mjaft i mirë.
E gjatë së enjtes, brenda kësaj hapësire të Manastirit të Deçanit ishte edhe ekipi i Tëvë1.
Mirëpo, At Janjiq nuk pranoi të deklarohet në lidhje me vendimin.
Kundër regjistrimit të kësaj prone në emër të Manastirit është Adem Lushaj, drejtor i “Shoqatës së Intelektualëve të Pavarur” në Deçan
Ai thotë se kjo tokë i është dhënë serbëve dhe jo kishës.
Për Lushajn, janë më shumë se sa 24 hektarë.
Në këto toka, dikur kishte edhe hotele.
Kjo tokë që është për-rreth manastirit të Deçanit dikur ka qenë e regjistruar si pjesë e ndërmarrjeve “Iliria dhe Apiko”
Aktualisht, Hoteli Iliria është i dëmtuar dhe jashtë funksionit.