Sigal Prishtina do të jetë edhe për disa javë pa kapitenin Dardan Berisha, i cili ende nuk është rikuperuar nga lëndimi që e pësoi muajin e shkuar.
Prishtina, të enjten me anë të një njoftimi ka bërë të ditur se krahas Berishës për disa javë do të mungojnë edhe Muhamedali Janjeva e Fisnik Rugova.
Berisha u lëndua në ndeshjen e Kosovës kundër Azerbajxhanit, ndërsa Prishtinës i ka munguar në tri ndeshjet e fundit në Superligën e Kosovës në basketboll.
Për dallim prej Berishës dhe Janjevës që pritet të rikthehen nga lëndimi në fund të muajit, një gjë e tillë nuk mund të thuhet edhe për Rugovën.
Sipas klubit, Rugova do të mungojë për një kohë të pacaktuar për shkak të lëndimit të krahut. Prishtina është e katërta në tabelë me 38 pikë pas 24 ndeshjeve të luajtura, ndërsa kapiteni Berisha këtë edicion ka luajtur me një mesatare prej 19 pikëve për ndeshje.
