Departamenti Amerikan i shtetit ka nënvizuar se shteti i Kosovës po çalon në disa fusha përmes raportit të përvjetshëm të saj.
Sipas dokumentit, raporte kredibile flasin për korrupsion serioz qeveritar dhe mosndëshkim të tij, krime që përfshijnë dhunë e kërcënime për dhunë ndaj pakicave etnike, kufizime serioze në lirinë e shprehjes dhe medieve., etj.
E ky raport është marrë edhe me shkarkimin e ish-kryetares së Komisionit Qendror Zgjedhor, Valdete Daka. Në dokument përmendet raporti i Misionit të BE-së për Vëzhgimin e Zgjedhjeve që kishte konstatuar se shkarkimi i Dakës nuk ishte arsyetuar dhe reagimi i organizatave që e kishin quajtur aktin të motivuar politikisht.
Daka në një prononcim për tëvë1 ka thënë se e ka pritur një reagim të tillë nga Shtetet e Bashkuara të Amerikës teksa atë e ka quajtur një leksion për presidenten.
“Ende jemi shumë larg nga ajo që pritet prej institucioneve të pavarura e sidomos nga presidenca. Kështu që mendoj se ky ka qenë një mësim, një leksion i mirë për zonjën Osmani”, tha Valdete Daka, ish-kryesuese e KQZ-së.
Përfshirja e rastit të Dakës në raportin e Departamentit Amerikan të Shtetit ishte i pritshëm edhe nga organizatat joqeveritare.
“Kjo paraqet edhe një pasiguri juridike kur një kryesues i një komisionit të pavarur shkarkohet para përfundimit të mandatit. Kjo është një praktikë e rrezikshme për arsye se kjo mund të përdoret në të ardhmen nga një president i ardhshëm kur për X arsye nuk pajtohet me veprimet e kryesuesit të KQZ-së mund ta shkarkojë. Kështu që besoj se tani nga reagimi i DASH institucionet duhet të kenë kujdes me rastin e veprimeve të tilla”, tha Yll Zekaj, menaxher i programit në Institutin e Kosovës për Drejtësi.
Edhe nga Lëvizja Fol thonë se institucionet duhet të jenë më të kujdesshme në ndjekjen e procedurave për përzgjedhje e shkarkime.
“Mësimi kryesor që duhet ta merr Qeveria është ndjekja e procedurave për zgjedhje nëpër institucione të ndryshme të pavarura pra duhet me kuptu shteti që shpeshherë qëllimi edhe nëse është i mirë nuk mjafton. Është shumë e rëndësishme që procedura dhe rruga ligjore të ndjeket”, tha Erblin Hoxha, Koordinator i Projekteve në Lëvizjen FOL.
Daka ishte shkarkuar me arsyetimin se kishte shkelur integritetin dhe pavarësinë e KQZ-së. Ajo ishte ankuar në Avokatin e Popullit por ky institucion ia kishte hedhur poshtë ankesën me arsyetimin se nuk i kishte shterur paraprakisht të gjitha mjetet juridike. Televizioni i ka dërguar pyetje Ombudspersonit por ata nuk kanë komentuar raportin e Departamentit Amerikan të Shtetit.
Raporti i gazetarit Gojart Jashari.
