Gjithçka brenda kësaj hapësire u bë shkrumb e hi.
E zjarri që ka kapluar katin e dytë të objektit të Gjykatës Themelore në Ferizaj – Dega në Kaçanik ka arritur deri në tavan.
Madje copëzat e dritares janë parë edhe në oborr.
Sipas burimeve te televizionit, zjarri dyshohet se u shkaktua nga tre persona, ku ata përdorën këto shkallë emergjente për të hyrë në objekt në orën katër të mëngjesit të së mërkurës.
Zyrtarja për informim në këtë gjykatë, Gentiana Hoxha ka thënë se materialet që janë djegur kanë qasje edhe online.
Sipas Hoxhës, hetimet janë në fazën fillestare.
Nga Policia e Kosovës kanë konfirmuar se për zjarrin janë informuar në ora 4 të mëngjesit.
“Ekipi i zjarrfikësve dhe policia kanë dalë menjëherë në vendin e ngjarjes me çka është lokalizuar zjarri, janë ndërmarrë masat e nevojshme dhe zjarri është shuar si dhe kanë zhvilluar procedurat dhe marrjen e provave. Si pasojë e zjarrit ka pas dëme materiale por jo pasoja me njerëz. Sipas të dhënave të Organeve kompetente dyshohet për zjarrëvënie nga persona të panjohur deri më tani”
Tëvë1 ka provuar të marrë një qëndrim edhe nga zjarrfikësit mirëpo të njëjtit nuk kanë pranuar të flasin.
